Петропавл билігі екі жер үйді 340 млн теңгеге сатып алмақ

Бұл – бюджет қаржысын тиімсіз жұмсау, деп есептейді жергілікті халық

Әкімдіктегілер бұл баспаналарды сүріп, орнына балабақша салуды көздеп отыр, деп хабарлайды Информбюро 31.

Бірақ мемлекеттік сатып алулар сайтында жарияланған сома көпшіліктің наразылығын туғызды. Бұл – бюджет қаржысын тиімсіз жұмсау, деп есептейді жергілікті халық.

Сауда шартына сәйкес әр үйдің жалпы ауданы 200 шаршы метрден кем болмауы тиіс. Сондай-ақ, жер учаскесі болуы шарт. Яғни, қала әкімдігі сатып алуды жоспарлаған үйдің бір шаршы метрінің құны 700-800 мың теңге аралығында болмақ. Бұл нарықтағы бағадан екі-үш есе қымбат.

Ал тұрғындар бұл жыл бойы ұқсата алмаған қазына ақшасын игерудің таптырмас жолы деген пікірде. Былтыр да жыл соңында қала әкімдігі екі мұнараны Жаңа жыл мерекесіне орай безендіру үшін 230 миллион теңге жұмсамақ болған. Алайда халықтың наразылығынан кейін конкурс тоқтатылған еді.

– Тәуелсіз бағалаушылар әр үйдің құнын 170 млн теңге деп белгіледі. Аталған жұмыс заң талаптарына сәйкес мамандандырылған сарапшылармен жүргізілді. Бұл үйлердің орнына балабақша салу жоспарланған. Сондықтан жер телімдерін мемлекет меншігіне алу қажет. Үйлер алынбайынша балабақша құрылысын бастау мүмкін емес, – дейді Петропавл қаласы ТҮКШ бөлімінің баспасөз хатшысы Бердімұрат БАЙМҰҚАН.

Фото: видеодан кадр.

АЛЫП-ҚОСАРЫҢЫЗ БОЛСА, ТАЛҚЫЛАЙТЫН TELEGRAM КАНАЛЫМЫЗ БАР!