ШҚО ормандарында өртті ерте анықтау жүйесі орнатылады

Бұған дейін Бурабайда, Абай және Павлодар облыстарында іске қосылған

Шығыс Қазақстан облысындағы ормандарға алғаш рет өртті ерте анықтау жүйесі орнатылмақ.

Жабдықтар антенналық-діңгекті құрылымдар түрінде болады. Сол арқылы орман аумағындағы өрт ошақтарын жедел анықтауға мүмкіндік жасалмақ.

— Өртті ерте анықтау жүйелері облыстағы тоғыз орман шаруашылығында орнатылады. Барлығы 90 антенналық-діңгекті құрылым қойылады. Олар түтін шыққан жерді анықтап, ақпаратты орталық диспетчерлік пунктке жібереді. Мұндай діңгектер бізге аса қажет, себебі өңірдің жер бедері таулы болғандықтан өртті дер кезінде анықтау әрдайым мүмкін бола бермейді, — дейді ШҚО Табиғи ресурстар және табиғат пайдалануды реттеу басқармасының басшысы Мұрат Құсайынов.

Мұндай жабдықтар Шығыс Қазақстанда алғаш рет орнатылады. Бұған дейін Бурабайда, Абай және Павлодар облыстарында іске қосылған.

— Маусым мен шілде айларында діңгектер Ұлан және Самар аудандарында орнатылады. Қалған құрылымдарды биыл жылдың соңына дейін және келесі жылы кезең-кезеңімен орналастыру жоспарланған, — дейді М.Құсайынов.

Фото: ТЖМ.

АЛЫП-ҚОСАРЫҢЫЗ БОЛСА, ТАЛҚЫЛАЙТЫН TELEGRAM КАНАЛЫМЫЗ БАР!