Ақтөбеде салынған жаңа үй екі жыл өтпей қисая бастады

Тұрғындар адвокат жалдап, сотқа жүгінуді жоспарлап отыр

Ақтөбеде бес қабатты жаңа үйдің тұрғындары бір күні үйіндінің астында қалудан қорқып отыр, деп хабарлайды Жетінші арна.

Себебі қабырғасы мен төбесіне сызат түскен. Айтпақшы, бұл үйдің пайдалануға берілгеніне екі-ақ жыл. Бұл жағдайды құрылыс компаниясы мен әкімдіктегілер қалай түсіндіреді?

Орынгүл МАЙАСАРОВА пәтеріндегі сызатты көрсетіп, жыларман күйде жүр. Қабырғадағы жарықтар уақыт өте үлкейіп барады, тіпті жаңасы пайда болған. Ол бұл пәтерді ипотекамен алған. Үйдің өзі небәрі екі жыл бұрын салынып біткен. Яғни, жаңа үй.

— Біздің үйіміз мына жаққа қарай қисайып бара жатыр, екі көршімдікі дворға қарай қисайып бара жатыр. Ұсақ трещиналар басталды, басында ойладық, осадка беріп жатқан болар, жаңа үй деп. Бірақ трещина әлі тоқтаған жоқ, — дейді ол.  

Тұрғындардың айтуынша, мәселе жерасты суларында емес, үйдің сапасыз салынуында. Олар өз қаржысына тәуелсіз сарапшыларды шақыртқан. Тексерудің қорытындысы бойынша, үй әртүрлі материалдардан: силикат кірпіш пен шлакоблоктан тұрғызылған, балшығы да сапасыз. Соның кесірінен екі подъезде, әсіресе бесінші қабатта жарық пайда болып, ол төменгі пәтерлерге түсе бастаған. Ол аздай, көктем сайын еріген қар суы үйдің іргесін шайып өтеді.

Тұрғындардың шағымынан кейін мемлекеттік сәулет-құрылыс бақылау инспекциясы жоспардан тыс тексеріс жүргізген. Олардың күдігі расталды: үйдің тірек қаңқалары нашар күйде болып шықты. Құрылыс компаниясына кемшіліктерді жою үшін уақыт берілген, бірақ ол талап орындалмаған.

Құрылыс компаниясының Ақтөбедегі өкілдерімен хабарласу мүмкін болмады. Телефондары сөндірулі. Құрылыс компаниясы барлық кемшілікті 15 желтоқсанға дейін жоюға тиіс. Егер бұл мерзімде орындалмаса, инспекция компанияны әкімшілік жауапкершілікке тартпақ. Ал тұрғындар адвокат жалдап, сотқа жүгінуді жоспарлап отыр.

Фото: tv7.kz.

АЛЫП-ҚОСАРЫҢЫЗ БОЛСА, ТАЛҚЫЛАЙТЫН TELEGRAM КАНАЛЫМЫЗ БАР!