Алатауда тұратындар Алматы-Қонаев жолымен тегін жүреді

Алматыға баратын жалғыз жолдың ақылы болғаны ұят болар деп шешіпті

Алатау қаласының тұрғындары Алматы – Қонаев автожолының ақылы учаскесі бойынша тегін жүріп-тұру құқығына ие болды, деп хабарлайды ҚазАқпарат.

Алатау әкімдігінің мәліметінше, аталған тас жолда тегін жүріп-тұру жаңадан құрылған қалада тіркелген көлік құралдарына абоненттік төлемсіз ұсынылады.

– Аталған шешім Алматы – Қонаев автомобиль жолының әлеуметтік маңызы бар нысан екенін ескере отырып қабылданды. Бұл жол Алатау қаласын Алматы қаласымен және облыс орталығы – Қонаев қаласымен байланыстыратын негізгі әрі іс жүзінде жалғыз көлік қатынасының жолы, – делінген мәлімдемеде.

Әкімдік көлік құралдары бұрын Іле ауданында тіркелген Алатау қаласының тұрғындарына көлік құралының техникалық паспортын жаңарту қажет екенін ескертті. Құжатты жаңарту кезінда мемлекеттік тіркеу нөмір ауыспайды. Ал қызмет құны — 1,25 АЕК (5 406 теңге).

– Техникалық паспорт жаңартылғаннан кейін көлік құралы Алатау қаласында автоматты түрде есепке алынып, Алматы – Қонаев ақылы жол учаскесі бойынша тегін жүріп-тұру құқығы беріледі, – деп хабарлады әкімдік.

Фото: Досбол Атажан.

АЛЫП-ҚОСАРЫҢЫЗ БОЛСА, ТАЛҚЫЛАЙТЫН TELEGRAM КАНАЛЫМЫЗ БАР!