Шакира Қазақстанға келу үшін 7,5 млн доллар сұрап жатыр

Сосын концерт өтетін алаң кемінде 50 мың көрерменге арналған болуы тиіс дейді

Қазақстанда әлемдік жұлдыздардың концерті өтеді деген жаңалықтар жиі талқыланып жүр. Алайда олардың талаптары оңай емес екені белгілі болды, деп хабарлайды Sn.kz.

Концерт ұйымдастырушысы Алексей ПУЧКОВ әлеуметтік желідегі Threads парақшасында Шакира мен Эминемнің Қазақстанда өнер көрсету мүмкіндігі туралы пікір білдірді.

Оның айтуынша, Шакираны елге шақыру бойынша келіссөздер біраз уақыттан бері жүргізіліп келеді. Дегенмен әзірге нақты келісімге қол жеткізілмеген. Себебі әншінің командасы қатаң талаптар қойған.

Атап айтқанда, концерт өтетін алаң кемінде 50 мың көрерменге арналған болуы тиіс. Сонымен қатар, жұлдыздың гонорары 7,5 миллион долларды құрайды. Ұйымдастырушы мұндай жағдайда концерт өткізудің қаншалықты тиімді болатынына күмән келтірді.

Соған қарамастан, қазақстандық тараптың қызығушылығы әлі де жоғары екені айтылды. Яғни келіссөздер толық тоқтаған жоқ.

Ал Эминемге қатысты жағдай басқаша. Пучковтың сөзінше, рэпер қазіргі уақытта Қазақстанға ғана емес, жалпы гастрольдік сапарларға шығуға аса ниетті емес.

Айта кетейік, бұған дейін БАҚ-та 2026 жылы Қазақстанда әлемдік деңгейдегі жұлдыздардың концерті өтетіні туралы ақпарат тараған болатын. Тіпті Алматыдағы Орталық стадионда ірі концерт ұйымдастыру жоспарланып жатқаны да айтылған еді. Алайда әзірге бұл жоспарлар нақты жүзеге аса қойған жоқ.

Фото: instagram.com/shakira.

АЛЫП-ҚОСАРЫҢЫЗ БОЛСА, ТАЛҚЫЛАЙТЫН TELEGRAM КАНАЛЫМЫЗ БАР!