Қазақстанда 200 мыңнан астам кәсіпкер бизнесін жапты

Бірақ Үкімет бұдан трагедия жасаудың қажеті жоқ деп есептейді

Салықтық бақылау алғашқы нәтижесін бере бастады. Ресми дерекке сүйенсек, жыл басынан бері 200 мыңнан астам кәсіпкер ісін тоқтатқан. Бұл өткен жылмен салыстырғанда екі есе көп, деп хабарлайды Astana TV.

Бірақ Үкімет бұдан трагедия жасаудың қажеті жоқ деп есептейді. Өйткені жабылғандардың басым бөлігі – табысы мен жұмысшысы жоқ, тек қағаз жүзінде бар кәсіпорындар.

– Салықтың көбеюіне жай ғана ақша жинау емес, экономикалық белсенділік пен салықты басқарудың жақсаруы себеп болды. Бұл – бизнестегі құрылымдық өзгеріс: жұмыс істемейтін жеке кәсіпкерлер жабылып, бір бөлігі іріленіп заңды тұлғаға айналуда, ал енді бірі өзін-өзі жұмыспен қамтушы ретінде заңдасып жатыр, – деді ҚР Премьер-министрінің орынбасары – Ұлттық экономика министрі Серік ЖҰМАНҒАРИН.

Салық органдары сүзгіден өткізуді тоқтатпайды. Егер сіздің жеке шотыңызға үш ай қатарынан, ай сайын жүзден аса әртүрлі адамнан ақша түсіп, оның жалпы сомасы 1 миллион теңгеден асса, сіз автоматты түрде бақылауға ілігесіз. Ал туыстар мен достар арасындағы тиын-тебен немесе тойдағы көрімдік үшін алаңдаудың қажеті жоқ. Жүйе тек жүйелі түрде келетін табысты нысанаға алады.

– Белгіленген өлшем шарттан асқан жеке тұлғалардың мәліметтері мемлекеттік кірістер органындарына екінші деңгейлі банктерден келіп түседі. Алынған мәліметтерге сәйкес мемлекеттік кірістер органдары тарапынан камералдық бақылау жүргізіледі және жеке тұлғаға қатысты камералдық бақылау нәтижелері бойынша анықталған алшақтықтар туралы хабарлама жолданады, – дейді Ұлдана СҮЛЕЙМЕН, ҚР ҚМ МКК Жұртшылықпен байланыс хатшылық басқармасының сарапшысы.

Бұл – жай ғана бақылау емес, цифрлық талдаудың нәтижесі. Салық органдары банктерден алған мәліметтерді арнайы ақпараттық жүйелер арқылы өңдеп, кәсіпкерлік қызметтің белгілерін анықтайды. Бұл жердегі негізгі мақсат жеке тұлғалар арасындағы туыстық немесе тұрмыстық аударымдарды емес, жасырын жүргізіліп жатқан сауда-саттық айналымын ашыққа шығару.

– Мәселе ақшаның көптігінде емес, оның тұрақты түрде түсіп тұруында. Егер адам жеке шотын күнделікті табыс табу үшін пайдаланса, бұл кәсіпкерлік қызмет болып есептеледі. Ондай азамат өзін кәсіпкер ретінде тіркеп, ай сайынғы төлемдерді төлеп, кәсібін ашық жүргізу керек, – дейді зкономист Арман БЕЙСЕНБАЕВ.

Мамырдағы хабарламалар әзірге ескерту ғана. Бірақ ескертуді елемегендерге 157 мың теңге көлемінде айыппұл қарастырылған. Мемлекет кәсіпті буындыру емес, көлеңкеден шығаруды көздеп отыр. Ал мобильді аударымды күнделікті тұрмыста, отбасы ортасында пайдаланатын қарапайым азаматтарға алаңдауға еш негіз жоқ.

Фото: astanatv.kz.

АЛЫП-ҚОСАРЫҢЫЗ БОЛСА, ТАЛҚЫЛАЙТЫН TELEGRAM КАНАЛЫМЫЗ БАР!