Ұлын мектепке жібермегені үшін көпбалалы ана сотталды

Оған 41 мың теңге айыппұл салынды

Жамбыл облысы кәмелетке толмағандардың істері жөніндегі мамандандырылған ауданаралық соты кәмелетке толмағанды тәрбиелеу және білім беру жөніндегі міндеттерді қайта орындамау (ӘҚБтК 127-бабының 2-бөлігі) фактісі бойынша азаматша П.-ға қатысты істі қарады.

Сот анықтағандай, азаматша П.-ның 2011жылы туған, әлі кәмелетке толмаған ұлы қыркүйектен бастап мектептегі сабақтан себепсіз қалып қойған.

Бұған дейін де 2025 жылдың маусымында П. ұлының мектепке бармағаны үшін сотпен әкімшілік жауапкершілікке тартылған.

ӘҚБтК-нің 127-бабы 2-бөлігінің санкциясы 15 АЕК мөлшерінде айыппұл немесе 5 тәулікке дейінгі мерзімге әкімшілік қамаққа алуды көздейді.

Кәмелетке толмаған балалардың болуын, кінәсін мойындауын және ауырлататын мән-жайлардың жоқтығын ескере отырып, сот айыппұл мөлшерін 30%-ға азайтты.

Сот қаулысымен азаматша П. ӘҚБтК-нің 127-бабының 2-бөлігі бойынша кінәлі деп танылды және оған 41 мың теңге көлемінде айыппұл тағайындалды.

Қаулы заңды күшіне енген жоқ.

Фото: edu.kz.

АЛЫП-ҚОСАРЫҢЫЗ БОЛСА, ТАЛҚЫЛАЙТЫН TELEGRAM КАНАЛЫМЫЗ БАР!